في إحدى حفلات بلدة بلوزا 1987
ـ1ـ
يا بْلَوْزا.. سَيِّدْنا الْيَوْمْ
جَايِي يْبَارِكْ خِبْزَاتِكْ
إِسْمُو تِرْتِيلِه بِالصَّوْمْ
عَطْفُوا نَوَّرْ عَتْماتِكْ
كِرْمالُو ما تْخَلِّي النَّوْمْ
يِطْفِي الشَّمْع بْسَهْراتِكْ
كِرْمالُو خَلِّيكِي دَوْمْ
قانا.. وْصُبِّي نْبِيداتِكْ
ضْيُوفِكْ، بِهَـ الْحَفْلِه قَوْمْ
يا ما حِلْفُوا بِحْياتِكْ
ـ2ـ
يا بْلَوْزا.. شُو ما حْكِينا
الْغُرْبِه رَحْ تِمْحِي الْكِلْماتْ
بْعدْنا عَنِّكْ وِشْقِينا
وْهاكْ الْحُلْم الصَّافِي ماتْ
ضِحْكِه مْنِ الْقَلْب عْطِينَا
دِبْلِتْ بِالْهَجْر الْبَسْماتْ
بِـ حُضْنِكْ رِبَّيْتِينا
وْقِسْتِي بِالشّبْر الْقَاماتْ
اشْتَقْنالِكْ.. لا تِنْسِينا
مدِّي إِيدِكْ.. لاقينا
إِنْتي يا أَحْلى الإِمَّات
**
حمام السلم
إحدى حفلات جمعيّة بلوزا الخيرية ـ 1984 سيدني
ـ1ـ
بْلادِي.. إِذَا رَحْ يِنْطِفي عِزَّا
بْعَلِّقْ عيُوني شْمُوعْ عَ أَرْزَا
قْناديلْ ما بِتْنُوصْ طُول الْعُمْرْ
مْزَيّتِي بِالدَّمّ.. يا بْلَوْزَا
ـ2ـ
يا ضَيْعِة اللِّي بْحِبّهَا عْبادِه
وِبْحِبّ شَعْبِكْ هَوْن.. بِزْيادِه
عَلَّى جْبِينِكْ تا يْطال الْغَيْمْ
وِيْقَطِّف النّجْماتْ لِبْلادِي
ـ3ـ
قِضَّيْت عُمْري رَوِّض الْهجْرانْ
وْإِحملْ صَليبي كْرامِة الإِنْسانْ
فَرْد مَطْلَبْ بِسْأَلَكْ يا رَبّْ:
رَجِّعْ حَمام السِّلمْ عَ الأَوْطانْ
**