بمناسبة عيد ميلاد ابنة اخي ماريان بعيني لولش الخمسين
خمسين سنه يا ماريان
يا بنت خيي الخلقت بلبنان
إنتي الوحيده الفرحت الأرزات
بـ طلتك.. يا زينة النسوان
خلقتي بوطن فديوه بالدمات
وجيتي ع سيدني وزلغط الهجران
خمسين سنه.. هاي كمشة حكايات
نصّا فرح.. نصّا عمر تعبان
وبيّك ع طول يحيّك منامات
لبنتين حدّن أجمل الصبيان
وامك.. إذا منصنّف الإمّات
إخدت محبّة خالق الأكوان
وحدّك فهيم الصهر.. لمن فات
ع قلوبنا.. صار القلب بستان
وعن جاسينتا بقول هالكلمات
تقلا دهب وتكسّر الميزان
وعمك وقت ما شابت الشعرات
وما عاد يمشي متل هالغزلان
حابب بعرسا يكتّر الرقصات
وهيي قبالو لابسه الفستان
بلون التلج.. وبإيدها الزهرات
ويا ماريان بصوتك الرنان
رح نسمع زلاغيط وصلاوات
وفرحة جاسينتا يباركا الديان