ألقيتها في حفلة رأس مسقا، 7/3/1992
ـ1ـ
ناطِرْ عَ دَرْب الْوَعْد لاقِيكي
يا راسْمَسْقا، وْصِيرْ غَنِّيكِي
غِمَّضْت عَيْنِي، حْلمْت حُلْم كْبِيرْ
فتَّحْت عَيْنِي عَ أَهاليكي
أَحْبابْ.. مِتْلُنْ صَعْب إِنُّو يْصِيرْ
شِرْبُوا الْفَضِيلِه مِنْ سَواقِيكِي
لَوْلا الْحَربْ والْمَوت والتّهجيرْ
كانُوا انْزَرْعُوا كلّهُنْ فِيكِي
لا سافْرُوا.. وْلا جَمّعُوا التّعتيرْ
وْلا فَيْلَتُوا الدَّمعاتْ تِبْكيكي
ـ2ـ
يا زَهْرةْ الْكُورَه الْمُخْضَرَّه
يا نجْمةْ الأرْض الشّمالِيِّه
لفَّيْت كلّ مْحَبّتي بْصرَّه
وْخِبَّيتْها جُوَّاتْ عِينَيِّي
وْزِيَّنْتها بِوْرودْ مِحْمَرَّه
تا قَدِّمُنْ، يا راسْمَسْقا، الْيَوْمْ
لأَحْبابْ نَوَّرْ فَضْلُن عْلَيِّي
ـ3ـ
جَمْعيّتِكْ.. جَمْعِيِّةْ الإِحْسانْ
تْأَلّفِتْ.. تا تِرْفَعْ الإِنْسانْ
أَعْمالْها.. أَعْلامْ عَمْ بِتْلُوحْ
عَ بْراجْ مِبْنِيِّه بْصَخر صُوَّانْ
أَعْضاءها.. سَكْنُوا الْقَلب والرُّوحْ
كلُّنْ فَضِيلِه وْتَضْحِيِّه وْإِيمانْ
زَرْعُوا الْغُرْبِه زْهُور عَمْ بِتْفُوحْ
وْلَوْلا زْهُورُنْ ما انْعَرَفْ نيسانْ
هاماتْهُنْ.. تِيجانْ فَوْق صْرُوحْ
وْطَلاّتْهُنْ.. طَلِّةْ قَمَر فِرْحانْ
وْقاماتْهُنْ.. أَرْزاتْ مِنْ لُبْنانْ
ـ4ـ
وْمُسْتَوصفِكْ.. مُسْتوْصفْ الرَّحْمِه
بْجَنَّاتْ حُبُّو عْيُونْنا بْتِسْرَحْ
فاتِحْ عَ كَفُّو عْيادِةْ الْحِكْمِه
وْتارِكْ بِقَلْبُو لِلأَمَلْ مَطْرَحْ
ضَوَّى بْضِحْكِةْ أَرْمَلِه الْعَتْمِه
وْمَحَّى بْإِيمانُو ظْرُوفْ عَمْ تِجْرَحْ
وْلَوْلا سَخَا الْغِيَّابْ.. هَـ الْكِلْمِه
ما انْقَالِتْ.. وْلا زَلْغَط الْمَسْرَحْ
يا رَاسْمَسْقَا.. بْصَرْتِك بْنَوْمِي
عَمْ تِضْحَكي.. تا يِضْحَك الْمَظْلُومْ
وْعَمْ تِفْرَحي.. تا شَعِبْنا يِفْرَحْ
**
ولاد ضيعتنا
حفلة جمعيّة رأس مسقا الخيريّة عام 1987 سيدني
ـ1ـ
يا مِيةْ هَلاَ بِوْجُودْ أَحْبابِي
بْضِحْكاتْ عَطْيِتْ نُورْ سَهْرِتْنا
يا راسْمَسْقَا الْـ حَضْنِك كْتابِي
مِنْ كِتِرْ ما مِنْحِبّ غِيَّابِكْ
مِنْقُول: هَوْدي وْلادْ ضَيْعِتْنا
ـ2ـ
يا رَاسْمَسْقَا.. سْنِينْ خَلْف سْنِينْ
بْقِلِّكْ شِعْر وِالأَرْض محْتِرْقَه
احْتَلِّت بْلادِي زُمْرِة شْياطِينْ
احْتَرْفُوا الْقَتْل والنَّهْب وِالسِّرْقَه
زَرْعُوا الْفِتْنِه بَيْن دِين وْدِينْ
وْقَسّمُونا.. وْحَبّذُوا الْفِرْقَه
يا رَاسْمَسْقَا.. خَبّري مْساكِينْ
لَوْلا بْغَدْرُن كلّنا مِنْمُوتْ
وِحْدِة شَعْب لُبْنان رَحْ تِبْقَى
ـ3ـ
مَحْرُوق قَلْبِي كْتِيرْ يا إِخْوانْ
عَ طفْل ماتِتْ مَيْمتُو حَدُّو
عَ بْلادْ كانِتْ زِينة الْبُلْدانْ
حَرْقُوا ضِيَعْها.. وْصَرْحها هَدُّوا
عَ شَعْب.. إِسْمُو شَرَّف الإِنْسانْ
مَرْفُوع رَاسُو وْما حَدَا قَدُّو
قِدَّامْ مَجْدُو رَكْعِت التِّيجانْ
وِالْعِزّ شَامِه مْزَيّنِه خَدُّو
لِعْبُوا بْتارِيخُو.. شَوّهُوا الأَدْيانْ
وْمَلْيُون جَيْش تْقاسَمُوا حدُّو
خَلِّيكْ رَمْز الْحُبّ يا لُبْنانْ
وْلا تْخاف لَوْلا انْبَحِّت غْنانِيكْ
الْغِيَّابْ حِلْفُوا مَجْدَكْ يْرِدُّوا
ـ4ـ
هْجَرْناكْ يا لُبْنانْ.. ما مْنِنْلامْ
خَنْق الْفِكر.. ما بْتِقْبَلُو الأَقْلامْ
مْن الصَّعْب يِرْضُوا بْعِيشِتُنْ أَحْرارْ
بِبْلادْ مُشْ مَسْمُوحْ فِيها كْلامْ
وْمِن كِتر ما رْفَضْنا نْسِيب الدَّارْ
دِقْنا الْغَدر وِالْقَهْر وِالآلام
مْشِينا عَ دَرْب الْجلْجلِه.. تا صَارْ
دَمْع الْيَتامَى يِجْرُف الأَحْلامْ
هْجَرْناك.. وَقْت الْجارْ خان الْجارْ
وْوَقْت اللِّي حِمْلتْ هَمّنا الأَيَّامْ
هْجَرْناكْ.. لَكِن قَلبْنا عَ نارْ
وِعْقُولْنا عَمْ تِنْخِرَا الأَوْهامْ
هْجَرْناكْ.. مُشْ مَعْقُول.. وِالتِّذْكارْ
بَعْدًو أَمانِه غَالْيِه عَ طُولْ:
حَبِّة تْراب بْصدْرنا بِتْنامْ
ـ5ـ
لَوْلا الْمَحَبِّه الطَّاهْرَه بِالْقَلبْ
وْهاك الأَيادي الْـ عَم بْتِتْبَرَّعْ
ما انْبَنْيِت بْأَرْضَكْ مَراكِزْ طُبّ
تْداوي طفْل عِينَيْه عَمْ تِدْمَعْ
وْرَاسْمَسْقَا.. الْتَفّ حَوْلا الشَّعْب
تَا يِنْبِنِي الْمُسْتَوْصَفْ وْيُوسَعْ
هَـ الضَّيْعِة الْخَضْرا.. بْإِذْن الرَّبّ
بْتِسْتَقْبِل الأَفْراح يا لُبْنانْ
وْما يْعُود مَرَّه قَلبْها يُوجَعْ
**
راس مَسقا
إحدى حفلات جمعية راسمسقا الخيرية ـ 1977 سيدني
ـ1ـ
يَا رَاسْ مَسْقَا الْـ كِلِّك مْحَبِّه
فِيكِي الطَّوَايِفْ عَايْشِه بْنِعْمِه
مْأَكَّدْ بِـ أَرْضِكْ.. هَيْكَلُو رَبِّي
عَمَّرْ قَبل ما تِنْتِعِشْ نَسْمِه
وْقَللاَّ: يَا أَسْرَار الدِّنِي تْخَبِّي
بِرْبُوع عَمْ تِضْوِي مِتِلْ نجْمِه
وْبِقْلُوبْ.. صُورَه مْزَغَّرَه لْقَلْبِي
وْبِعْقُولْ نَاسْ تْعَوّدُوا عَ الْخَيْرْ
قدَّامْ مَجْدُنْ رَكْعِت الْكِلْمِه!
ـ2ـ
يَا ضَيْعِة اللِّي بْتِقْسِمَا وَادِي
يَا رَمزْ كِلّ طْوَايِف بْلادِي
الدِّينْ عِنْدِك: تَضْحِيِه وْإِيمَانْ
مُشْ تِجَارَه وْغِشّ وِسْيَادِه
يا رَاسْ مَسْقَا.. لَوْ حِكِي الدَّيَّانْ
وْسَأْلِكْ: شُو بَدِّكْ إِعْمل بْلُبْنانْ؟
قُولِي: احْفَظُو.. تَا رَايْتُو تِنْصَانْ
وْيِبْقَى عَ طُول الدَّهر وِالأَزْمَانْ
جْرَاسْ دَيْر.. وْجَامِع عْبَادِه.
**