نشرت في الجزء الأول من سلسلة شربل بعيني بأقلامهم لكلارك بعيني 1986
ـ1ـ
كامل المر
إِنْت أَحْلَى مْنِ الْحِلُو يا مُرّْ
يا كامِل الْعَقْل الرَّزِين الْحُر
انْ خِرْطَشْت كِلْمِه عَ الْوَرَقْ
بِيغَارْ مِنْ رَهْجِةْ حَلاها الدُّرّ
ـ2ـ
جوزاف بو ملحم
جُوزَافْ بُو مِلْحِمْ.. يا ناسْ
كاتِبْ إِنْسَانِي حِسّاسْ
خَلاّنِي مْنِ كْرُوم النَّقْد
إِعْصرْ خَمْرَه وْإِشْرَبْ كاسْ
ـ3ـ
حسن درباس
ما بْيِنْحِبِسْ صَوْت الْبَلابِلْ
وْلا بْتِنْربطْ كِلْمِه بْسَلاسِل
ما دامْ حَرْفَكْ يا حَسَنْ
بْعَتْم الدّنِي فَبْرَكْ مَشَاعِلْ
ـ4ـ
ميشال حديّد
مِيشَال حْدَيِّدْ.. لَوْ كانْ
فِي مِتْلُو بْهَـ الدِّنْيِي كْتِيرْ
كِنَّا مِنْلاقِي الإِنْسَانْ
عَمْ يِخْلَقْ وِالْعَقْل كْبِيرْ
ـ5ـ
طوني شربل
طُونِي شَرْبِل.. لَوْ ما كانْ
ما حْمِلْت السَّيْف مْنِ زْمانْ
هُوِّي الْـ صَيَّرْنِي أُسْطُورَه
مَكْتُوبِه فَوْق النِّسْيانْ
ـ6ـ
البير زعيتر
أَلْبِير زْعَيْتِر وِالْحَرْف
إِخْوِه.. وْبَيُّنْ مُشْ مَعْرُوفْ
يِمْكِنْ قدْمُوس اللِّي صَفّ
أَوَّل كِلْمِه وْخِلْق حْرُوفْ
ـ7ـ
تريز حرب
تَريز حَرْب.. وْصَوْت أَرْزِتْها
نِعْمِه عَظِيمِه لْجالْيِتْنَا هَوْن
عَ طُول كِلْمِةْ حَقّ كِلْمِتْها
مِتْل الزّهُور الْغارْقَه بِاللَّوْنْ
تَريزْ حَرْب الْـ كلّها فَهْم وْذِكا
نُور الْحَضَارَه مِنْ شُمُوس بْعَلْبَكَا
خَلِّتْ أَدَبْنا بِالْمَهاجِرْ يِرْتِوِي
تَا يِشْهَدْ التَّاريخْ لَوْ مَرَّه حَكَى
ـ8ـ
أيّوب محمد أيوب
.. وْبِتْقُولْ عَنِّي الشَّاعِر الأَكْبَرْ
هَـ الْقَدّ صِرْت بْعَيْنَك مْخَتْيَرْ
إِنْت وْأَنَا يا صَاحْبِي أَيُّوبْ
بَيْتَيْن شِعْر زْغارْ بِالدَّفْتَرْ
ـ9ـ
زين الحسن
لَيْش تا سَمُّوك يا شاعِرْ غَرِيبْ
وْشِعْرَكْ عَ قَلْب النَّاس أَقْرَب مِنْ قَريبْ؟!
سْمَحْلِي اللَّيْلِه غَيِّر بْإِسْمَك حْرُوف
وْبَدْل الْحَسَنْ نادِيكْ: يا زَيْن الْحَبِيبْ
لَوْلا شِي مَرَّه كاسْ هَـ الْعُمْر انْدَلَقْ
وِتْطاوَلُوا عْلَيِّي، وْغَدَرْ فِيِّي الزَّمَنْ
رَحْ ضَلّ خَرْطِشْ مَجْد عَ جْبِين الْوَرَقْ
وْغَنِّي لْخُلُودَك شِعْر يا زَيْن الْحَسَنْ
ـ10ـ
رفيق غنوم
الْـ بِيكُونْ مِتْلَك إِنْت يا خَيِّي رَفِيقْ
صَاحِبْ وَفِي.. وْهَدَّدْ رَيَاحِينُو الْحَرِيقْ
بْخَبِّيهْ جُوَّا الْقَلْب.. وِبْدَمْع الْعُيُونْ
بِطْفِي الْحَرِيقْ.. وْبِنْشُل الْقَلْب الصَّديقْ
ـ11ـ
فرناندو فرنسيس
عَ وِجُّو بْلاقِي الإخْلاصْ
الْـ ما في قَبْلُو وْلا بَعْدُو
قِنْدِيلْ عُمْرِي انْ مَرَّه ناصْ
ضَوُّوا ضِحْكِةْ فِرْنانْدُو
ـ12ـ
نعيم خوري
نَعِيمْ خُورِي بْأَشْعارُو
جَمَّعْ لِلشِّعْر بْدارُو
وْصَفَّى يْرِشُّو فَوْق الصَّخْر
وْيِقْطُفْ زَهْر مْنِ حْجارُو
ـ13ـ
نديم سابا
لا تْخافْ إِنِّي خَتْيِر وْإِخْرَفْ
وْيِدِقّ بَابِي الْمَوْت يا خَيِّي نَدِيمْ
بْحَيْث الأَدِيب نْهايْتُو أَشْرَفْ
ما زَالْ بَعْد نْهايْتُو.. التّكْرِيمْ
ـ14ـ
مطانيوس مخول
بْفِكْتُورْيا.. مْطانْيُوس مَخُّولْ
ياما وْياما دَقّ طْبُولْ
لْشِعْرِي.. لإِسْمِي.. حَتّى صرْت
عَ جْناح النَّسْمِه مَحْمُولْ
ـ15ـ
البير كرم
كلْ ما عَقْلِي جَنّ وْطارْ
بْلاقِي عَقْلِي مَعْ غُوَّارْ
هُوِّي الْـ عَمْ يِرْسُم ضِحْكِتْنا
وِيْرَجِّعْنا وْلاد زْغارْ
ـ16ـ
ميشال سمعان
مِيشَال سِمْعان بِالْغُرْبِه
حْفَرْتِلُّو إِسْمُو بْقَلْبِي
هُوِّي الْـ صَيَّرْ كِلْماتُو
نْجُومْ.. تْضَوِّيلي دَرْبِي
**