إحدى حفلات الجالية 1977
ـ1ـ
يِسْعدْ مَساكُنْ يا أَعّزّ حْبابْ
يا أَمَل لُبْنان.. يا غِيَّابْ
جِينا تا نِسْهَرْ وِالْمَسَا يْخَبِّرْ
كْرامِةْ عِينَيْكُنْ هَـ الْقَمَرْ ما غَابْ
ـ2ـ
بْمَسْرَحْ أَرزْ لُبْنانْ مجْتِمْعِينْ
تا تِسْمَعُوا شُو رَنْدَحْ الشَّادي
وْشُو خَبَّر الْعُصْفُور الِبْساتِينْ
وْشُو قَسَّم الشّلاّلْ لِلْوادِي
جِيتُوا تْحَيُّوا ناسْ فنَّانِينْ
شَدُّوا وْتارُنْ مِنْ شلُوش الْقَلبْ
حَتَّى يْغَنُّوا أَرْزِة بْلادي
ـ3ـ
وْهَلَّقْ.. انْشَاللّـه بْتِفْرَحُوا وْبِتْضَلّ
قْلُوبْكُنْ بِالْحُبّ مِلْيَانِه
وْعَ بْيُوتْكُنْ شَمْس السَّعادِه تْطلّ
حَتَّى ما تِبْقَى عْيُون زِعْلانِه
بِالْوَرْد.. بِالْمَنْتُور.. بْزَهْر الْفُلّ
تِتْزَيَّن بْلادِي اللِّي مِنْهانِه
حْجارْ فَوْق حْجارْ صَعْب تْضَلّ
بَسّ رَحْ بِيضَلّ أَرزْ الرَّبّ
وِيْضَلّ حَدُّو شَعْب لُبْنانِي
**