مختارنا
الياس ناصيف أبي خطّار، مختارنا الدائم، شجعني طوال رحلتي مع القلم، لا بل كرّمني عدة مرات، خاصة عندما عدت الى بلدتي الحبيبة مجدليا
ـ1ـ
بدّي رحّب بالمختار
الخي، البي، وأحلى جار
ما بنسى هاك الطلّه
لمّن كنّا ولاد زغار
ستّي خرستين تقللي
وقدّاما في موقد نار:
لجيراني دوم بصلّي
لكن هالقلب بيحتار
ليش بترضّى ليل نهار
ع المختار الياس خطّار؟
ـ2ـ
بتتذكّر يا بو ناصيف
كيف عشنا والكفّ نضيف
سركيس طنسا وست ولاد
وبترونلّه.. وكم رغيف
ودكانه زغيره ببلاد
بسأل حالي: ليش وكيف
تركناها تا نعيش بعاد
بقلّك يا جاري وبضيف:
يا ريت العمر بينعاد
ومنرجّع هاك الجيره
الما فيها غش وتزييف
ـ3ـ
وبسيدني في عنّا ناس
كلّن رقّه.. مع إحساس
من مجدليا جايين
متل الزنبق بالقداس
قلوبن.. زهرات الياسمين
الكفّ بيعطي بدون قياس
هنيّال الأرز وصنين
بضيعه ولادا قديسين
بجاه العدرا ومار الياس
**
مختار
قدّمت بها مختار بلدة مجدليا السيد الياس ناصيف أبي خطّار في يوم محمد زهير الباشا عام 1989
منْ مجِدْلَيَّا جَايِي
الْياس الْمُخْتار الإنْسانْ
هُوِّي الْـ رَبَّانا كْفايِه
مِنْ يَوْم الْـ كِنَّا جِيرَانْ
حْكايِتْنا وَاللَّـه حْكايِه
لازِمْ تِحْكِيها الأَزْمانْ
عِشْنا بْضَيْعَه مْضُوَّايِه
مَزْرُوعَه حُبّ وْإِيمانْ
عْيُونَا لِلْمَجْد مْرَايِه
وِبْقَلْبَا أَرْزِة لُبْنانْ
**
شعر جديد
ألقيتها في بيت رئيس جمعية مجدليا السيد انطوني خوري، وكانت عقيلته نبيهة قد أعدت للضيفين الياس ابي خطار وفابيولا انيسة حلاوة الجبنة
بدّي قلّن شعر جديد
وما بقبل أشعاري عيد
لو ما تطلّوا يا أحباب
كان نتفه تأخّر هالعيد
والغصّه بقلب الغيّاب
محيتوها وراح التنهيد
"فوفو" اللي خدودا عنّاب
وشعرا ع الضهر عناقيد
بتشرق، لولا القمر غاب
وعتمات الليل تجاعيد
و"الياس" اللي قلبو داب
محبّه، انشالله عمرو يزيد
مختار.. وأعمالو كتاب
وبكتابو احلى اناشيد
جيران منبقى وأصحاب
بجمعيّه ريّسها سيد
ببيتو مشرّع هالأبواب
تا "نبيهه" تضيّفنا
حلاوة الجبنه بالتأكيد
**
كبير ضيعة
الى المختار الياس ابي خطار، سيدني ـ ميلاد 2019
ـ1ـ
كانوا يقولوا فلان بي الكل
رح قلّهن: في بيّ واحد انت
يا كبير ضيعه شعبها مِنْجلّ
ومنقدرك يا الياس وين ما كنت
ـ2ـ
منفرح إذا ع ديارنا بتطل
بتجيب ريحة أرض حلوه صنت
جنون الزعل بيطل بس تفل
وبتضل معنا لحظة الـ بيّنت
ـ3ـ
أرزة تواضع واقفه ع التلّ
وقلوبنا بميزان حبّك زنت
بهالعيد رح نهديك ورد وفل
ونقرّ إنّك بالصدور سكنت
ـ4ـ
كبير جيت.. كبير رح بتضل
محبّة أهالي ضيعتك ما خنت
يا الياس بو خطار.. يا مختار
فرحت كنيسة ضيعتي يا جار
بـ مجدليا لمّن تكوّنت
**